Johann Trollmann

De la Vikipidiya
Jump to navigation Jump to search
Yohan (Rukeli) Trollmann

Yohan Rukeli Trollmann (Jermanikani Chib: Johannes Trollmann) (1907-1943) And-o Trintonay [3-to chon] e bershesko 1933 kerdili kompetisiya e boksaki and-i Jermaniya tay yek but iklislo angluno (kampiyono) and-i kategoria e dopash pharengi. Lesko alav sas Erich Seeling, no o komite e sportesko, kay sas sa nasista, peravda les kotar-o titlo odoleske so sas but, nas Jermano. 3i k-o Baredivay, na achilo niyek kampiyono and-akaya kategorîya. Kerdili palem i kompetîsiya mashkar duy neve boksera: Yek "Ariyano", o Adolf Witt, tay p-e aver rig, o Yohan Rukeli Trollman. Akaya nevi kompetîsia na fayol sas e nasistenke, odoleske so o Trollman sas Sinto, pinjardo sar Sinto : leske sportesko alav sas o "Zigeuner". Numay nas so te keren, ov sas but pinjardo tay sa e jermana kamen sas les but, sas zorales popularo. E nasîsta na kamen sas te asbaven o xataripen e bute gadjenko tay mukhle les te kerel i kompetîsiya, na chudine les avri. Mamuy leske sas o Witt, odoleske numay ov sas les shansa te marel e Trollmanes tay e nasîsta usaren sas chachipenaske te peravdol o "Zigeuner", kay te iklon kadiyal kotar-i problemâ.

P-o 9-to Shovtonay [6-to chon], o "Zigeuner" telavda e Wittes. Anda sa e 12 rondura, o terno Trollman (sas 26-bershengo) khelda truyal o Witt, marda les, kîdiyas virama tay agoral lasakerdilo o "Ariyano". E nasîsta xale but xoli tay phende so i kompetîsia iklisli chuch-chuch (nul-nul). Kana dikhle akava bangipen, sa e gadje so avile sas te dikhen i kompetîsiya xolosayle, ushtile, kerde bari protesta tay phardine te phagen sa and-i sala.

Agoral, e nasîsta telile tay dine e Trollmanes o tîtlo Jermaniako kampiyono e dopash-pharenko. Imediat, e sporteski revîsta "Bokssport" lias te kushel les, phenindor so leske dumukha nane jermanikane, so may but khelel teyatro desar boksa tay so si les "romano bianglikanaveripen" (so o aver manush nashti te mangel anglal sar ka marel, odoleske so e Roma nanay len sestêma and-i boksa). Pala oxto dives, line leskar palem o tîtlo tay phagle leski karyera.

O Trollman na achilo kadiyal, makhla pe bala lole tay avilo anda yek aver kompetîsiya. Odovar na khelda troyal o aver boksiyero, achilo tordo k-o mashkar e ringesko sar belut tay xala sa e dumukha. K-o 5-to ronda, peravdilo sa pherdo rat tay sas avrichudino e sportestar.

Bersha palal, trin phrala leske sas bichalde and-e logora e konsentrasiyake tay ov gelo and-e Hitlereski armiya and-o b. 1939. Marda pe and-i infanterîya k-o rusikano chekat tay, kana avilo khere and-o b. 1942, te dikhel pe manushen, E Gestapo astarda les tay bichalda les and-o logoro e konsentrasiyako Neuengamme, kay musay sas te kerel e may phare buta. Kana e sorale SS-morshes e logoreske kidinon sas te keren sevka, akharen sas les te maren les p-i boksa, akana so sas 35-bershengo, bi xalo, bokhalo, khindo, nasvalo tay avel sas len p-o baro asaypen te peraven e "Jermaniake kampiyones" ay te lasakeren les. P-o 9-to Duytonay [2-to chon] 1943, e SS-morshes dine les kari (pushke) and-o Neuengamme tay mudarde les.


Ando bersh 2003 (60 bersha pal leskero meripen) o "Deutscher Berufsboxerverband" (boksengero organisasyiona ando Jermaniya) delas les o tîtlo "Deutscher Meister" (jermano Kampiyon). Akana ando leskero foro Hannover si o Johannes-Trollmann-Weg (Yohan-Trollmann-Drom).