Heinrich Himmler

O Heinrich Luitpold Himmler (nămcikanes: [ˈhaɪnʁɪç ˈluːɪtˌpɔlt ˈhɪmlɐ); arakhadilo p-o 7 oktòmbra 1900 – mulo p-o 23 màjo 1945) sas o Reichsführer anθar o Schutzstaffel (kaj znaći „arakhutni grupa“ ; SS), thaj jekh ingărindoj somdasno anθar i Nacistikani Partida anθar o Nămco. O Himmler sas jekh maśkar e maj zurale gaʒenθe anθ-o Nămco telal o Nacionàlo Socialismo thaj sas jekh baro arkitèkto e Samudaripnasqo.

O Himmler sas interesime palal o ćovaxanipen thaj e garavde bută deźa anθar pesqo ternipen. Vov phandăs kodo k-i pesqi rasistikani filozofia thaj, rodindoj vareso te sikavel ke sas ćaćo ke i Ariani thaj Nordikani rasa sas opralutni anθar o but phurano vaxt. Vov promotisardăs jekh bengesqi-devlikani sèkta vaj kùlto te rrugisaren le phuredadenθe, maj alosardes maśkar e somdasnenθe anθ-i SS, te avel jekh făl te arakhel śuʒi i rasa thaj te del śoxa’mulipen k-i nàcia. Dikhlindoj i SS sar jekh „Ordo” vaj societèta sar e Teutonenqe Marutne, vov kerdăs len te lien i Khangeri e Teutonenqo Ordo, anθ-i Viena anθ-o 1939. Vov śirdăs o procèso te paruvel o Xristianismo thaj pa lesqo than te ćhuvel jekh nevo moràlo zakono kaj sas mamuj o manuśipenismo (vaj humanitarianismo) thaj sas mamuj i Xristianosqi godĭ e ansurimosqo. O Ahnenerbe, jekh rodipnasqi societèta kerdo e Himmlesθar anθ-o 1935, rodăs p-i ljùmă te arakhel vareso te sikavel e opralutne thaj phurane orìgene e Germanikane rasaqe.