Deliya Grigore
E Deliya Grigore (Remenikanes: Delia Grigore) si ekh Romni andar e Rumuniya (biyandili: 7 Februara 1972, kay Galats). Voi barili kana e Rumuniya sas xulayardi e komunisturendar thay e Roma nas ekh prinjardi sel (laki familiya garavdyas lengo caco sel). Palal 1990to bershesko, kana e komunisturya peravden pen, voi dashti te phenel ke si caci Romni thay te palemsiklyovel e Romani chib [1]. Deatuncara, voi keres buti po Romano sanskrtipe thay arakhel e Romane cacimata. 2002to bershesko, manglyas e Rumuniyako statesko thay e xulaipnastar e Rumunikane Ortodokse Kristiyane Khangeryako te prinjarel e bilachimata so kerdyas panj shelbersha, ando vaxt e robiyako sistemo, ama von ci phenden palpale khanc [2].