Romlex

De la Vikipidiya

O Romlex (phendo "Rom-Leks" kaj mangel te phenel o Rromano Leksikòno) si jekh internetosqi rig kaj si buteder Rromane alavarǎ. I kherutni rig kaj phenel ël drabarnosqe "miśto avilǎn" phenel vi:

Miśto avilǎn k-o ROMLEX

O ROMLEX kerel dokumentàcia pal-o Rromano leksikòno. Del ël ǔtilizatorenqe i oportunitèta te dikhel ël materialurǎ anθ-ververe endajalekturǎ ël Rromane ćhibǎqe, thaj te lel amboldimata karing ververe ćhibǎ.

O ROMLEX na-i jekh Rromano alavari anθ-o sakodǐvesqo xatǎriben. O ROMLEX si jekh leksikàlno ginavnǎqibàza. Si les anθral ʒanglimata kaj si dosta te xatǎrel o ververiben anθ-o leksikòno sa ël Rromane endajalekturěnqo, thaj si paśal te sikavel sa o basićno leksikòno ël Rromane ćhibǎqo. Anθ-o akanutno vaxt, ël ʒanglimata si p-o Internèto kaj azban so maj but Rromane endajalekturǎ. Kodole si khethanes ël amboldimatença karing i Englezikani ćhib thaj, pal-o Rromano endajalekto, karing vi avere Evropaqe ćhibǎ. Te del jekh ëlektronikani sursa kaj si la so maj śukar kalitèta, kaj śaj avel mindig thodino p-o dǐves, o ROMLEXosqi ginavnǎqibàza śaj servil-pe sar jekh bàza vaś avutnovaxtesqo buxlǎriben ël Rromane literaturikane resursurěnqo thaj vi e Rromane ćhibǎqo.

Projektosqi Historia[editisar | modificare sursă]

Septèmbra 2000 - Kana si o eftato Maśkarthemutno Konferènco p-i Rromani Lingvistika anθ-i Sofia, o Yaron Matras vakărel anθar o śajipen te kerel jekh ëlektronikano Rromano alavari e Bakkeroça o Peter thaj e Halwachsoça o Dieter W. Manuśa kaj kerenas butĭ k-i Putardi Societèta Instituto, PSI / Budapèsta (englezikanes: Open Society Institute, OSI), kaj participisardine vi lenθe anθ-o kidipen thaj von line sama ke sas laćhi idèja thaj phendine ke o PSI kamel te aźutil o projekto te kerel jekh ëlektronikano alavari e Rromane ćhibăqo.

Novèmbra 2000 — o ROMLEKS (englezikanes: ROMLEX)— o Rromano Leksikonosqo Projekto, vastdino kaθar o Yaron Matras, o Dieter Halwachs thaj o Peter Bakker, śirdăs lovença kaθar o PSI karing o Universitèto anθ-o Graz. Bazime p-e manuśa kaj ambolden internetosqe materialură anθ-i Rromani ćhib, i struktùra e ROMLEKSosqi si kerdi.

Màjo 2001 — O buxlăripen e ROMLEKSosqo si kerdo śajutno kana si e lovença vaś o Universitèto anθ-o Machester kaθar o PSI. Atunća deśuśov Rromane siklŏvne kaθar deśujekh ververe thema aktivnones keren butĭ vaś o projekto anθ-o Machester thaj anθ-o Graz. Anθ-o akava anglutno kotor e butăqo, e alavarură, glossarură, alavenqe listură, th.k.m.d. si thovdine anθ-o ROMLEKSO thaj i internetosqi rig ʒal p-i lumăqi buxli drakhin.