Romano siklyaripen la Rumuniyatar
Katar 2.5% (prinjarde) ji kai 6-8% (mai chaches) andar Rumuniyake manusha si roma, o them kai beshen e buteder roma. But lendar phenen diyalekturya paruvde katar i rumunikani ćhib sar kăldărash, churari. Si vi aver diyalekturya paruvde katar i turkikani ćhib sar spoitori, vai aver balkanikane ćhiba, sar ursari (rićhinari}. Ando nordo le themesko, ande zhudetsurya Maramuresh, Bistrica-Năsăvud, Kluzh si roma so phenen karpatikane romane diyalekturya.
Andar bersha 90' kerel pes buti te avel ekh phandlo siklyarpnasko sistemo sa le romane diyalekturenge. O gajo Gyorge Sarău, so siklilyas buteder romane diyalekturya, kerdyas ekh siklyaripnaski programa so anderyarel lava thai gramatika andar sa le diyalekturya, zoryarindoi e purane indo-ariyanikane elementurya. Sar neolojismurya si lava andar indo-ariyanikane ( butvar hindi) thai anglezikani ćhiba.