Gheorghe A. Lăzăreanu-Lăzurică

O Gjorge A. Läzärǎno-Läzurikä vaj Ʒorʒ Läzurikä, phendo vi Läzäresko-Läzurikä vaj Läzärikä (1892 – ?), sas jekh baro śero e Rromane khethanipnasqo anθar i Rumunia, lipǎrdo vi pala i phakh kaj dǎs e maśkarmarimatanqi daxni politika anθ-i Rumunia. Maj anglal sas baśavno thaj jekh siklilo trampikano manuś kaθar gaʒǎrde/asimilime Rromane orìgene, vov lǎs sàma pala pesqo etnikano rat kana kerdǎs armàta anθ-e Rumunikane Phuvǎqe Zorǎ anθ-o I-to Sundalesqo Maripen. Jekh nevǎralo xramosarno anθ-i literatura kaj azbal e Rromani temàtika, vov sas aktìvo anθ-i Generalno Asociàcia e Ciganenqi anθar i Rumunia anθ-o berś 1933, ama vov ćhindǎs pesqe phandimata kadaja organizàciaça te astarel o Generalno Khethanipen e Rromenqo anθar i Rumunia, kaj lokhorres avili i maj zurali organizàcia. Anθar i septèmbra 1933 ʒi k-o màjo 1934, o Läzurikä sas vi jekh "Vojvod e Ciganenqo", prinʒardo sar kadea kaθar maj but Rumunikane Rromane grupe. Vov thaj lesqe sajekhgodǐsarutne avile te dikhen bilaćhes o anav "Cigane" thaj mangle te labǎren savorre o anav "Rromane", jekh idèa dini lenqe maj anglunes kaθar o Nikolaje Konstantin Bacaria. O Läzurikä zumavlǎs te giravel o alav Zgripce sar referinca ka-e butśunde paramićienqe phure e Rromenqe.