Desi

Desi (देसी) (vai deshi ढेशी) si yekh nav e manushenge so jiven ando Indikano Subkontinento (e thema: Indiya,Shri Lanka, Bangladesh, Nepal, Bhutan, Maldive) vai aven kothar. Si yekh moderno nav thai avel tar o sanskritikano lav देशः (deshah) so si "them", "dai phuv" andi romani. Desi navyaren pen vi sa le butya so aven andar o Subkontinento sar xaben, xuryavipen, gilya, filmurya thai kana labyardo, arakhel i pativ, o baripen le kadale butyende.

O nav labyardilo yekhto andi Nordutni Amerika thai Bari Britaniya. But manusha andar o Subkontinento gelen ande kodola thema te keren buti te aven lenge love. Von sas duryarde lenge themendar thai kamlen len but. Dikhlen vi so miazutne si von (makar yekh si indikano, aver pakistanikano, kolaver bangladeshikano thai sa kadya) mashkar le gorende (gora - "parno manush" vi nav andar i sanskritikani). Atunchi shirden te navyaren yekh avreste desi vai deshi (manush andar i "dai phuv") vi sa le butya andar o Subkontinento avile desi vai deshi. Kon vai so chi avel kothar si विदेशी videshi (romani: " bideshi").

O nav sigo avilo palpale ando Subkontinento thai avilo but mishto te na mai kerel dosha kana varekon del duma pe sa e manusha vai sa i phuv kothar. Le videshi acharyaren te navyaren indikano sa so avel kothar. Ama i Indiya si numa yekh kotor, le manusha le avre themenge na kamen te navyarel len indikane. Atunchi te del savorenge pativ thai te na kerel problemurya, mishto sas i phuv te navyarel la o (Indikano) Subkontinento vai Sudutni Asiya vi e manushen desi.

Le desi andar o Okchidento kerden yekh desi kultura. Butshunde si le desi so lekhaven sar Salman Rushdie, Anita Desai, RK Narayan, Monica Ali thai aver. Bashavne sar Punjabi MC, Apache Indian, Junoon si kamlyarne vi ando Okchidento vi andi Sudutni Asiya. I desi xaben si akana yekh andar mai mangle xamata.

Po shirdipnaste, e aver manusha (le videshi) chi janglen mishto so si kado lav, anda kodya so nichi le desi chi phenen but pe lendar kodolende. Akana avel mai janglo, kana si but restauranturya desi ando Okchidento vi MTV kerel MTV Desi ande Phandavde Thema (USA).

Vi dikh

• ABCD

Avrutne phandimata

• yekh site po desi lekhipen
• o yekhipen le Sudutni Asiyake lillekhitoriya
• yekh asochiacia so arakhel le desiyenge xakaya

Kadava lekh si bibarilo, akana si numa ekh kotor. Kana janes buteder, shai te lachhares les.