Johann Trollmann
Johann TROLLMAN (1907-1943) And-o Tirdaraj [3-to ćhon] e berśesqo 1933 kerdili kompetìcia e boksaqi and-i Germània thaj jekh зut iklislo angluno (kampiòno) and-i kategòria e dopaś pharenqi. Lesqo anav sas Erich Seeling, no o komite e sportesqo, kaj sas sa nazistǎ, peravdǎ les kotar-o tìtlo odolesqe so sas зut, nas Germàno. 3i k-o Baredivaj, na aćhilo niekh kampiòno and-akaja kategòria. Kerdili palem i kompetìcia maśkar duj neve boksèrǎ: jekh "Ariàno", o Adolf Witt, thaj p-e aver rig, o Johann Trollman. Akaja nevi kompetìcia na fajol sas e nazistenqe, odolesqe so o Trollman sas Sinto, pinзardo sar Sinto : lesqe sportesqo anav sas o "Zigeuner". Nùmaj nas so te keren, ov sas but pinзardo thaj sa e Germànǎ kamen sas les but, sas zorales populàro. E nazìstǎ na kamen sas te azbaven o xatǎripen e bute gaзenqo thaj mukhle les te kerel i kompetìcia, na ćhudine les avri. Mamuj lesθe sas o Witt, odolesqe nùmaj ov sas les śànca te marel e Trollmanes thaj e nazìstǎ uзaren sas ćaćipnasθe te peravdǒl o "Zigeuner", kaj te iklǒn kadial kotar-i problèma.
P-o 9-to Baredivaj [6-to ćhon], o "Zigeuner" telǎvdǎ e Wittes. Anda sa e 12 ròundura, o terno Trollman (sas 26-berśenqo) kheldǎ trujal o Witt, mardǎ les, kìdias virama thaj agoral laзǎkerdilo o "Ariàno". E nazìstǎ xale but xoli thaj phende so i kompetìcia iklisli ćhućh-ćhućh (nul-nul). Kana dikhle akava bangipen, sa e gaзe so avile sas te dikhen i kompetìcia xolosàjle, uśtile, kerde bari protèsta thaj phàrdine te phagen sa and-i sàla.
Agoral, e nazìstǎ telile thaj dine e Trollmanes o tìtlo Germaniaqo kampiòno e dopaś-pharenqo. Imediat, e sportesqi revìsta "Boxsport" lias te kuśel les, phenindor so lesqe dumukha nane germanikane, so maj but khelel teàtro desar bòksa thaj so si les "rromano biangliзanǎveripen" (so o aver manuś naśti te зanel anglal sar ka marel, odolesqe so e Rroma nanaj len sistèma and-i bòksa). Pala oxto dives, line lesθar palem o tìtlo thaj phagle lesqi karièra.
O Trollman na aćhilo kadial, makhlǎ pe bala lole thaj avilo anda jekh aver kompetìcia. Odovar na kheldǎ trujal o aver boksièro, aćhilo tordo k-o maśkar e ringesqo sar belut thaj xalǎ sa e dumukha. K-o 5-to round, peravdilo sa pherdo rat thaj sas avrićhudino e sportesθar.
Berśa palal, trin phrala lesqe sas bićhalde and-e logòra e koncentraciaqe thaj ov gelo and-e Hitleresqi àrmia and-o b. 1939. Mardǎ pe and-i infanterìa k-o rusikano ćekat thaj, kana avilo khere and-o b. 1942, te dikhel pe manuśen, i Gestapo astardǎ les thaj bićhaldǎ les and-o logòro e koncentraciaqo Neuengamme, kaj musaj sas te kerel e maj phare butǎ. Kana e zorale SS-mànǎ e logoresqe kidinǒn sas te keren zèvka, akharen sas les te maren les p-i bòksa, akana so sas 35-berśenqo, bi xalo, bokhalo, khindo, nasvalo thaj avel sas len p-o baro asaipen te peraven e "Germaniaqe kampiones" aj te laзǎkeren les. P-o 9-to Februàra [2-to ćhon] 1943, e SS-mànǎ dine les karie (puśke) and-o Neuengamme thaj mudarde les.
Ando bersh 2003 (60 bersha pal leskero meriben) o "Deutscher Berufsboxerverband" (boxengero organisatio ando Jermanija) delas les o titlo "Deutscher Meister" (jermano champion). Akana ando leskero forro Hannover si o Johannes-Trollmann-Weg (J.-T.-Drom).
